09 Ноябрь 2017
Ёшлар Иттифоқининг делегацияси Санкт-Петербург шаҳрида

Санкт-Петербург шаҳрига Ёшлар Иттифоқининг 21 кишидан иборат делегация аъзолари ташриф буюрди. Санкт-Петербургда делегацияни юқори савияда кутиб олишди.
Транспорт институтида ташкил этилган очиқ мулоқотда Санкт-Петербургдаги барча олий таълим муассасалари талабалари, қолаверса, ректорлари ҳам иштирок этди.
Учрашув кўтаринки, самимий ва очиқ руҳда ўтди.  Олий таълим муассасалари ректорлари ва талабалар ўзларини қизиқтирган саволларга делегация аъзоларидан атрофлича жавоб олдилар. 
Очиқ мулоқот давомида 20 нафар ватандошимиз ўқишини тугатиб, Ўзбекистонга қайтишини маълум қилди.
Сафар давомида Ўзбекистон Ёшлар Иттифоқи Марказий Кенгаши раиси Қаҳрамон Қуронбоев бошчилигидаги делегация аъзолари Санкт-Петербургда Ўзбекистондан ишлашга борган меҳнат муҳожирлари билан учрашдилар.
Аниқланишича, кўп муҳожирлар паспортларини йўқотиб, ортга қайтиш бўйича муайян муаммоларга учраганлар.
Бу масалалар бўйича делегация аъзоси, Ўзбекистон Республикаси Ички ишлар вазирлиги Миграция ва фуқароликни расмийлаштириш бошқармаси бошлиғи Бадриддин Шорихсиев улар билан суҳбат қилди.
Суҳбат давомида меҳнат муҳожирларига амалий ёрдам бериш ва уларни Ватанга қайтариш бўйича тизимли ишлар олиб борилиши таъкидланди. Делегация фаолиятида Ўзбекистон халқ артисти М.Азизов, Ўзбекистонда хизмат кўрсатган артист С.Ҳамроқулов ва Ўзбекистон бадиий жамоалари ижодий бирлашмасининг "Лазги" ашула ва рақс ансамбли хонандаси А.Собировлар иштирок этишмоқда.

 

Охирги янгиланиш: 17.11.2017 | 20:06