Xalqimizning qadimdan shakllangan folklor san’ati har bir hududning o‘ziga xos ohanglari, qadriyatlarini ifoda etishi bilan ahamiyatlidir. Keyingi yillarda ushbu san’at turini keng ommalashtirishga alohida e’tibor qaratilmoqda.

Jumladan, Prezidentimizning 2022-yil 2-fevraldagi “Madaniyat va san’at sohasini yanada rivojlantirishga doir qo‘shimcha chora-tadbirlar to‘g‘risida”gi qarori ijrosini ta’minlash, yosh iste’dodlarni izlab topish va qo‘llab-quvvatlash maqsadida bugun Andijon shahrida “Kelajak” bolalar folklor jamoalari respublika festivaliga start berildi.

Festival xalq og‘zaki ijodi namunalaridan “Lapar”, “Yalla”, “O‘lan”, baxshichilik sanʼati, urf-odat va anʼanalarimizni ulug‘lovchi o‘yinlar, raqs, qo‘shiq, musiqa ijrochiligi yo‘nalishlarini qamrab olgan.

Asosiy maqsad bolalar folklor sanʼatini rivojlantirish, sheʼriy ijodiyot, xalq dostonlari, hunarmandchilik, milliy liboslar va xalq o‘yinlari, urf-odatlarni saqlab qolish hamda ularni keng targ‘ib etish, milliy anʼanalarni asrab-avaylashdan iborat.